𝙏𝙊𝙍𝙊𝙆 𝙈𝘼𝙇𝘼𝙈 𝙉𝘼𝙏𝘼𝙇

𝙏𝙊𝙍𝙊𝙆 𝙈𝘼𝙇𝘼𝙈 𝙉𝘼𝙏𝘼𝙇,24 𝘿𝙚𝙨𝙚𝙢𝙗𝙚𝙧 2022

𝘚𝘶𝘮𝘣𝘦𝘳 𝘨𝘢𝘮𝘣𝘢𝘳:𝘍𝘰𝘵𝘰 𝘱𝘦𝘳𝘢𝘳𝘢𝘬𝘢𝘯 𝘱𝘦𝘳𝘴𝘦𝘮𝘣𝘢𝘩𝘢𝘯

“SA ANAK WARA LOAH ONE OKA TE BA HAMBOR AGU SELAMAK SANGGEN ATA”

Yo Mori Ngaran ata jari agu dedek par awo, koleb hale, ulun le, wai’n lau. Liub agu impung sangged weki serani one wie go’o kud idep legamimi di’a dite Mori kamping gami manusia one temu tana lino toe ma dopon agu toe ma beten, toe ghanang tombo landing agu pande. 

One wie penong berkak go.o, sangged weki serani paroki St.Kristoforus Waning etan tua, wan ata koe, manga taung ranga neki sa taung weki naka sama anak wara ata loah one oka, ba hambor agu selamak sanggen ata. Ngaji agu dere, gitu tanda naka agu naring di’a de Morin ata toe ma dopon agu toe ma beten.

 One wie penong berkak go kole suju agu hiang sangged weki serani ai Raja Hambor sai ga. Imbi lami hia ba hambor agu selamak sanggen ata. One wekin manga nera, nera kut pande gerak neteng bendar te sengka neteng-neteng nai de weki serani ata nendep kid, hina mai gitun, go ngoeng agu nggelek nata sangged weki serani paroki santo Kristoforus Waning ata manga ranga one wie penong berkak goo, te tegi nai ngalih tuka ngengga Dite Mori sambe ata sai one tempat haki agu loah one oka de domba.

Te san: 

Latang sangged ema ata sau landuk gereja katolik, puung lau mai ema paus, uskup, pastor paroki, sangged imam agu sangged biarawan/i. teing koe sebo weki agu wakar nai ata ngalih, mbereh koe nai, kut neka rantang halang daat agu buru warat te ba kreba ata nera te anggom ata lalo landing do weki serani ata toe rinduk kole ngo ngaji minggu. 

Te huan:

Latang sanggged ema ata saun landuk one negara hoo, puung ema presiden Jokowi sampe RT somong wan. Tegi gami one wie nggeluk ghoo kud sangged ihe ata sau landuk one negara goo, widang nai nggeluk dite kudut papong agu pepil nai pande ngantak negara goo dan adil pande wintuk kud minak sangget lawa, mesik neteng weki. Dahor sangged ata sau landuk lelo sangged ata kasi asi nego lelo ranga de Kristus uwa goo. Tegi kole legmi dahor ihe hod sau landuk mbereh toto hambor, molor, agu adil. Rani koe nai dihe te pampang koe ata laing raga, te poto koe ata pande gego kaeng golo, te witir koe ata gising nuk wekit agu wa’ut.

Te telun:

Latang sangged kilo serani, dahor le sai de Raja Hambor sangged kilo serani neka koah neho kota begah nego kena. Emo koe tombo do, toi koe one gori tua koe one duat kudut ita haeng siwal bolek loke, basa tara, rantang pangang mtaung PKH, dere mtaung BLT, ngalih kali nai gerak koe nuk kut dumpu mohe ata dia nggari olon.

Te patn:

Latang sanggen uwa weru, reba-mola agu sangget anak koe, nage le Loah Anak de Morin one wie go, loah kole nai gawah, todo nai molor te kawe gerak one kaeng golo agu one bangku sekolah. Okeh sangget ngonde, podoh sangget homoh. Emoh tombo do, rasang rak rait ati pande di’a. Heber ngo duat, gejur ngo kuliah, gempur one sekolah lut wintuk de Yesus, Guru ata wintuk sangget ata nungkun. 

Le mai gitun, sangged sawal agu tilir ghami one wie nggeluk goo, toto agu podo legami one roti agu wae anggor nenggitu kole agu sangged gejur agu wua duat gami. 

Yoooooooo…….latang ite ema pastor ata ujung pu’u pongo lobo sangged weki serani. Imbi legami ite kali ata kopn te podo one Mori wowo sangget tegi agu gesar ghami. Ite kali ata patu agu naun tombo sangget podo tura sangget ba gami umat serani one osang altar de Morin. Olo mai ranga dite manga sangged weki serani, hosti agu anggor, nggitu kole gejur agu cir gori gami. Ite muing ata naun agu patun te elang kamping mori dewa, te tombo kamping mori wowo. Ite kole ata luju mu’u emah lema te sawal kamping ngaran, keng kamping dedek, kud neki sa koe lite agu weki dara run Mori Yesus Raja Hambor eta lobo compang nggeluk. 

Yooooooooo…….toe reweng kanang “kepokkk”